რა არის მუსიკა? რა გავლენა აქვს მას ადამიანზე და როგორ ზემოქმედებს იგი საზოგადოებაზე? ეს არის საკითხები, რომლებზეც ხშირად მიფიქრია. მერე სადღაც უილიამ კონგრივის სიტყვები წავიკითხე, რომ „მუსიკა ფლობს მაგიურ ძალას, წამიერად ახდენს გაფანტული გონების კონცენტრაციას და ამშვიდებს აფორიაქებულ სულს" და გადავწყვიტე ამ თემაზე პატარა პოსტი დამეწერა.
მუსიკა, რომ ადამიანის ცხოვრებაში ძალიან ინტიმურ ადგილს იკავებს ამაზე ყველა თანხმდება. როგორც ამბობენ, იგი ხელოვნების სახეა, რომელიც სინამდვილეს ასახავს და აქტიურად ზემოქმედებს ადამიანის ფსიქიკაზე. თითოეული კულტურის, ხალხის ხასიათის თავისებურებები ვლინდება მის მუსიკაში. იგი არა მარტო ესთეტიკური სიამოვნებაა, არამედ ემოციებისა და გარშემომყოფთა ხასიათის აღქმის უნარი. იგი უვითარებს ადამიანს ნებისყოფას, მიზანდასახულობას, მოთმინებას.
ადამიანი ყოველთვის მიისწრაფვის რთულისკენ და ყურადღებიდან რჩება მარტივი საკითხები, რომლებსაც მნიშვნელოვნად არასდროს თვლის. ყოველთვის ვცდილობთ ვიხმაროთ მაღალფარდოვანი სიტყვები, ვცდილობთ ისინი ვიყოთ ვინც სინამდვილეში არ ვართ. დაუსრულებლივ ვთამაშობთ დაუწერელ როლს და საქმე საქმეზე რომ მიდგება მარტივი საკითხების გადაჭრა აღარ შეგვიძლია, სამაგიეროდ ოდესღაც ჩანერგილი პატივმოყვარეობა დაკმაყოფილებული გვაქვს და ჩვენს სინდისის ქენჯნას საპატიო მიზეზით ვახშობთ და ვამართლებთ ჩვენს უმეცრებას იმით, რომ რთული საკითხების გადაჭრით ვიყავით დაკავებულნი.
მუსიკა ადამიანის ცხოვრებაში მთავარი ინგრედიენტია. თქვენთვის არ ვიცი, მაგრამ ჩემთვის მუსიკა ჟანგბადია (როგორ ბანალურადაც არ უნდა ჟღერდეს). მუსიკა გვასაზრდოებს და გვმატებს ცხოვრების ხალისს. ბევრს აქვს პრეტენზია, რომ ის გემოვნებიან მუსიკას უსმენს, მათ შორის მეც. რათქმაუნდა, ჯასტინ ბიბერის ფანებისთვის ჯასტინი ღმერთია, ჩემთვის კი ის არ არის ღმერთი (სხვა რაღაცის დაწერა მინდოდა, მაგრამ მკრეხელობაში ჩამეთვლებოდა და თავი შევიკავე). აი ზუსტად არ ვიცი რას ნიშნავს სიტყვა გემოვნება, მაგრამ ის ზუსტად შემიძლია ვთქვა, რომ ყველა ადამაინას არ გააჩნია საკუთარი გემოვნება. მე ვიცნობ კიდეც ასეთებს. არიან ადამიანები, რომლებიც როკს მხოლოდ იმიტომ უსმენენ, რომ ის "ცვეტშია” ან იმიტომ, რომ როკს უსმენს ის ადამიანი, რომელიც მას მოსწონს. აი იმ გამოთქმას არ ვეთანხმები, რომ გემოვნებაზე არ დაობენო, სწორედ ყველაზე მეტს გემოვნებაზე დაობენ. მე როგორც ასეთი როკის მსმენელი ვარ, მიუხედავად ამისა ვერ ვიტან ე.წ. "ჟანრში ჩაკეტილ” ხალხს. როკი მიყვარს, ვუსმენ, მაგრამ ვაფასებ კლასიკას, დასაკვრელად ჯაზიც მომწონს. მე არ ვარ ჟანრში ჩაკეტილი! კლასიკიდან მოდის ყველაფერი და ვფიქრობ, რომ ადამიანი თუ არ უსმენს უნდა აფასებდეს მაინც კლასიკას…
როკ-მუსიკა — მუსიკის პოპულარული ჟანრი, რომელიც განვითარდა 1960-იანების შემდეგ, განსაკუთრებით ამერიკასა და ბრიტანეთში. მას ფესვები 1940 და 1950-იანების როკ-ენ-როლიდან აქვს. როკ-მუსიკაზე დიდი გავლენა იქონია R&B-მ და ქანთრიმ. როკის ერთ-ერთი მთავარი ინსტრუმენტებია ელექტრო გიტარა, ბას-გიტარა და დრამი.
GNR (Guns N` Roses)
განზ-ენ-როუზიზ ( Guns N' Roses) არის ამერიკული ჰარდ როკ ჯგუფი, რომელიც ჩამოყალიბდა კალიფორნიაში, 1985 წელს.
1986 წლის დასაწყისში ჯგუფმა ასეთი სახე მიიღო: ექსლ როუზი (ვოკალი), სლეში (სოლო გიტარა), იზი სტრედლინი (რითმ-გიტარა), დაფ მაკ-კეგანი (ბას გიტარა) და სტივენ ადლერი (დრამი). ლოს-ანჯელესისკენ მიმავალ გზაზე მათ დაწერეს სიმღერა "Welcome to The Jungle", რომელიც შემდგომში ჯგუფის ერთ ერთ ჰიტად იქცა. ჯგუფის მუსიკალურმა სტილმა, სცენაზე ხშირად გამოჩენამ და ცუდი ბიჭების იმიჯმა ხელი შეუწყო დაეპყროთ გვიანი 80-იანების და ადრეული 90-იანი წლების ჰარდ როკის სცენა.
1980-იან წლებში განზ-ენ-როუზიზმა მეტალში შემოიტანა უფრო სერიოზული, ემოციური, ხანდახან კი პოლიტიკური დატვირთვის მქონე მუსიკა. ჯგუფის როკ-ენ-როლური სტილი სრულიად განსხვავდებოდა იმდროინდელი ამერიკული ახალგაზრდობის გემოვნებისგან, რომელიც ორიენტირებული იყო ალტერნატივაზე, ელექტრონულ მუსიკასა და ჰიპ-პოპზე. ამ ჯგუფმა 9 თვის მანძილზე, მუსიკალურ კომპანიასთან კონტრაქტი გააფორმა და ყველა ჩარტი დაიპყრო - მას შემდეგ, რაც MTV-ზე ჯგუფის ვიდეო ღამის საათებში რამდენიმეჯერ იქნა ნაჩვენები. მათი ალბომი" Appetite for Destruction" გაყიდვების მხრივ ითვლება ყველა დროის ერთ-ერთ საუკეთესო ალბომად.
|